حاجات غريبة او بسيطة او اي حاجا
ولكنها..
ب تعجبني جدا..
يعجبني لما بنتي تقفز في حضني فجأة لما تتخض او تسمع صوت غريب او تخاف من حاجا
بحس اني "كونتينر" الامان بالنسبة لها
يعجبني لما ابقى سايقا العربية والاقي طفل في العربية اللي قدامي زهقان وطفشان ولما ارعشله النور ويبصلي اقوله باي باي او اعمله وش مضحك يضحك و يقولي باي باي
بحس اني طفلة
يعجبني جدا لما الاقي حركة ذوق من شخص يفترض انه عديم الذوق اصلا!!!
مرة كنت سايقا والمرايا اللي جنب اللي جنب مقفولة
وانا بقى فضلت اعمل شقلباظات واشد الحزام و اتدلدل يمين وشمال عشان اطولها وافتحها وانا سايقا
لدرجة اني بقيت جسم مرمي بالعرض في العربية واتنين عين و دراع ع الدريكسيون
وفي خضم المعركة
لقيت سواق ميكروباص معدي جنب وشاولي ب ايده انه قربي عليا
ف "حدفت" عليه وبحركة لوزعية راح فاتحلي هوا المرايا
انبهرت جدا؟؟؟!!!!
اه والله ولسا منبهره اهو...
ومن يومها كل ما اعوز افتح المراية احدف على ميكروباص واشاورله انه بليييييييييييييز
يعجبني التعبيرات البسيطة..
واحد ينزل من عبيته مخصوص عشان يعدي راجل او سيدة عجوز
عسكري يمسك ايد اطفال مدرسة يعديهم الشارع
مريضة تجيبلي تفاحة او عسلية مخصوص!
يعجبني جدا لما اعمل لنفسي فنجان نسكافيه على مزاجي ب 4 معالق سكر و نص معلقة نسكافيه وكله لبن بدون ماء
اااااااااااامممممممممممم اممممممممم
عاجبكوا ايه؟
