اليوبيل السنوى للسد العالى كان من كام يوم سمعت حكايات فخر وذكريات لرجال اشتركوا فى مشروع مصرى مصيرى فى وقت من أصعب أوقات مصر إقتصادياً وسياسياً. هذا المشروع كان حلم وتحدى لكل المصريين آنذاك، حلم حقيقى جمعهم بحق وحقيق وليس طنطنة إعلام. بعدتحقق المشروع كان خير لكل مصرى. ففى رأيكم ماهو المشروع الذى ممكن أن يجمع جهود المصريين فى وقتنا هذا بنفس الطريقة؟.
عدل سابقا من قبل Admin في الأحد فبراير 06, 2011 8:01 pm عدل 1 مرات
تحية لكتيبة بناة السد العالي وانا كنت شايفهم في برنامج ومستضيفين الراجل المحترم المهندس حسب الله الكفراوي ياه ع الناس ده كانوا شباب كلهم حماس وولاء للبلد كانوا بيشتغلوا بكل اخلاص الواحد لما سمع الحكاوي ده كان مبسوط قوي
بس ياترى فين الهدف القومي اللي يجمع الشباب المصري حواليه والله لسه فينا خير وامل بس تايهين كلنا نفسنا تبقى بلدنا احلى بلد بس محدش بيدينا الفرصة نفسي يجي اليوم اللي نلاقي فيه حد يدينا الفرصة عشان نخدم بلدنا بس ده عمره ماهيحصل الا لما كل مجتهد ياخد حقه ما يبقاش فيه تعيينات لولاد الدكاترة بس والقضاء لابناء القضاء والشرطة وشركات الكهرباء زالبترول
المشروعات القومية اللي ممكن تجمع كل المصريين متعددة أذا خلصت النوايا و أصبحت هناك أرادة سياسية حقيقية لتغيير واقعنا المر ... يحضرني مثلا المشروع الرائع للعالم فاروق الباز الخاص بــ ( ممر التعمير في الصحراء الغربية ) و أتذكر أن الممر يبدأ من البحر المتوسط شمالا حتى جنوب مصر موازي لوادي النيل يبعد عنه 800 كم غربا و يتخلله ممرات عرضية ( 12 ممر عرضي بطول 800 كم . ) من النيل شرقا حتى الممر الرئيسي غربا و بكدة يكبر الوادي الضيق اللي زانقين نفسنا فيه عدة أضعاف و يفتح مجال و آفاقا لكافة أنواع التنمية و الأستثمار الصناعي و الزراعي و التجاري و يحل مشكلة الأسكان المستعصية لبلد عايشة على 5% من مساحتها و متر الأرض في الصحراء بيتباع ب أربع آلاف جنيه !!!!! ....
متهيألي من السهل يكون ده مشروع قومي يحل نص مشاكل البلد لو خلصت النوايا و العالم فاروق الباز بيتكلم فيه من أكتر من عشر سنين وعنده كافة الدراسات و بالمواصفات العالمية بس حد يطلبها ....... لا حياة لمن تنادي .... ليه ما يبقاش مشروعنا القومي الحالي اللي نتلف حواليه و يبعث فينا الأمل من جديد .. كنا بنخش كلنا الجيش بعد ما نتخرج دلوقتي نص شبابنا بياخدوا أعفاء طب ليه ما نديهمش الفرصة و في كل تخصصاتهم يبنوا حلم لبلدهم فيفيدوا و يستفيدوا مستقبل أفضل ليهم و لولادهم .
الناس ورا النظرة الباهتة ...... على الأمل صاحية و بايـــتة
مهما الليالي تطول فايتة ...... و بكرة جي ... قوموا قابلوه
و ان دارت الدنـــــيا علينا ..... و ليلت مـــــــــــــن حوالينا
هنبات في أحضان أهالينا .... و الا نتبعتـــــــــــــــر و نتوه
من اهم القرارات المصيرية في تاريخ الامة المصرية كان بناء السد العالي ( بصراحة اهم القرارات المصيرية دي كانت موجودة في عصر جمال عبد الناصر ...)
ولما كان السد العالي مشروع قومي عظيم ونقطة تحول في تاريخ مصر ........... فحتي الآن يستحق ان نقف له وقفة تعظيم ونترحم علي زعيم امة كل هدفه هو بناء تلك الأمة وتحريرها ..... ونفكر شوية ايه اللي حصل بعد كدة يستحق الوقفة ........ ؟ وايه اللي لازم نقف له علشان يتحقق ؟ فيه حاجات كتير محتاجة نقف لها ونتصدي لها بحزم وقوة وصلابة نقف واقفة رجل واحد ........
شكراً لك يااخي الكريم علي فتح هذا الموضوع
بس في هذا الصدد لازم اترحم علي روح جدي العزيز رحمة الله عليه لأنه كان من المهندسين اللي شاركوا في بناء السد العالي ونام ليايلي في النيل في عز البرد هو ومجموعة هايلة من المهندسين والمصممين والعمال اللي كانوا بيشتغلوا بقلبهم قبل ايدهم ........ رحمة الله عليك ياجدي العزيز وعلي كل من شارك في بناء وتطوير ونهضة هذا الوطن ....... ليتنا نقدر مافعله هؤلاء ونحافظ عليه ..... ان لم نكن نستطيع ان نكمل مابدأوه
